يا أهل السودان البلد دي ما ساي البلد دي أمنا شالتنا صغار وحتظل في ضهرنا كبار لكن أمكم الليلة موجوعة ومتألمة والجرح كبير والدم نازل
*أخواني وأخواتي*
كفاية فرقة وكفاية قطيعة كفاية كلمة انت من وين وانا من وين كفاية كوز وشيوعي ويساري ويميني كلنا في النهاية سودانيين
والبيت البيتعمر بيدين أولاده كلهم
الكهرباء ما بتولع إلا بي يد المهندس السوداني والمستشفى ما بتشتغل إلا بي يد الدكتور السوداني
والزراعة ما بتنتج إلا بي عرق المزارع السوداني والجندي السوداني هو البيحرس الحدود
ما سألونا قبيلتنا شنو ولا انتماءنا شنو
سألونا بتعرف تشتغل ولا لا….
*يا شعب السودان* الوطن ما بينبني بالحقد ولا بينبني بالتنقيص الوطن بينبني بالعرق والتعب والضمير
الزول الناجح خلوه ينجح عشان يرفع البلد كلها والزول الفاشل حاسبوه براهو ما تحاسبوا قبيلته لأنو التاريخ ما بذكر القبيلة
التاريخ بذكر العطاء والإنجاز والمواقف
*ورسالة تانية مهمة* السموحة طيبة والدعوات بترفع البلاء لو غلطت في حق زول سامحه ولو زول غلط في حقك سامحه من قلبي
اختلاف الرأي لا يفسد للود قضية
الدنيا فانية والموت ما بفرق بين زول وزول السموحة سمحه.
*نتعاون ونتفق بدل الفرقة والشتات* نحافظ على أمن الوطن بحس وطني خالصونخت في بالنا انو زمن الفوضى والهرجلة انتهى بلا رجعة
البلد داخلة مرحلة انضباط وهيبة دولة وسيادة قانون لازم
إثباتك معاك في أي محل القانون واحد على الكل مدني كان ولا عسكري مافي واسطة ومافي محسوبية أمن يا جن نتعاون لكشف العملاء والمترصدين ضد الوطن ..
*يا سودانيين الغربه* في الغربيه
جدة كانت لمة وكرم وتكاتف
خلونا نرجع جدة لسيرتها الأولى
وخلونا نرجع السودان كله لسيرته الأولى..بلد واحد شعب واحد قلب واحد.*ربنا قال*
(إن أكرمكم عند الله أتقاكم) وقال “واعتصموا بحبل الله جميعاً ولا تفرقوا” وقال *ونزعنا ما في صدورهم من غل إخواناً على سرر متقابلين*
*وصيتي الأخيرة ليكم*
أمسكوا في بعض قوي خلو يد الشايقي مع يد الدنقلاوي مع يد النوباوي مع يد الفوراوي يد الجموعي مع يد الشكري مع يد البديري..كلنا واحد وكلنا اخوان
السودان محتاج رجال ما محتاج انساب محتاج عقول ما محتاج عروش محتاج ناس تشتغل ما ناس تتفاخر.فخلو الذكرى الطيبة بيناتنا..
*محمدطه محمد عبدالله*
