*إخوتي وأخواتي* في المجتمع السوداني رسالتي اليكم من قلب موجوع لكن بحبكم وبحب تراب البلد لدي ملاحظنين كلنا للأسف الشديد إنو بقينا شعب بنحب الفارغات وبنتابعها بنجري ورا تريند وبننسى وجع وطننا وبنضيع زمننا في أشياء لا تشبهنا ولا تشبه عاداتنا ولا عقيدتنا المستمدة من ديننا الحنيف ودا ما عيب فيكم والله دا هروب من الواقع الموجع.لكن يا أهلي فوقوا واصحوا وارجعوا لأصلكم وقيمكم.. المشكلة أكبر من تريند وأغلى من مشاهدة وأعظم من تعليق ساي نحن شعب أصيل تربى على الشهامة والكرم والنخوة وديننا علمنا حب الوطن من الإيمان والانتماء للأرض َ.. وهذا شرف سوف لا نفرط فيه الوطن ما بتباع والوطن ما بيتقاس بدرهم ولا بدولار الوطن تاريخ وأجداد وتراب وأرض دفعت دماء عشان نعيش عليها ووطن يعني هوية يعني كرامة يعني اسم بنفتخر بيهو قدام الدنيا كلها ولازم نحافظ على مكتسبات وطننا من تعليم وصحة ولغة وثقافة وأخلاق لأنو لو فرطنا فيها الليلة بكرة ما بنلقاها والزول ما بكون أرخص من الملابس اللابسا…ملابسك بتتغير لكن وطنك لو راح ما بتعوض وقيمك لو انحرفت ما بترجع بالساهل فتمسكوا بعقيدتكم وبعاداتكم السمحة الورثناها من أجدادنا..ما تقلدوا كل شي تسمعوه ولا تجروا ورا كل موجة تجيكم خليكم سودانيين أصيلين في لبسكم وكلامكم وأخلاقكم لأنو التقليد الأعمى بكسر الزول من جوه ولسه الخير فيكم كتير في المعلم البعلم في معسكر النازحين وفي الدكتور البعالج في المستشفى وفي الأم الشايلة عيالها في نص الحرب ديل ما عندهم زمن للفارغة ديل شايلين البلد في ضهرهم بصمت ونحن ما بنجلد بعض ولا بنشتم بعض نحن بنذكر بعض إنو مهما الضغوط كترت ومهما العروض كترت الكرامة والانتماء للوطن ما عندهم سعر وعلاجنا ما في التخوين علاجنا إننا نطالب كلنا بدولة تحترم مواطنها توفر ليه شغل كريم وأمان وكرامة لأنو الزول الكريم ما بفرط في وطنو بسهولة فبالله عليكم ما تخلوا الفارغة تسرقكم من وطنكم ولا تخلوا التقليد يبعدكم من دينكم وأصلكم اصبروا وتمسكوا بهويتكم السودانية حافظوا على مكتسبات وطنكم وارفعوا راية الوطنية عالية ما عشان شخص ولا حكومة عشان السودان دا حقنا كلنا وعشان أولادنا بعد سنين يسألونا كنتو وين لما السودان احتاج ليكم فنكون رافعين راسنا ونقول كنا واعيين وكنا بنحب وطننا رغم الجرح وكنا بنحافظ على قيمته وعلى ديننا لأنو حب الوطن من الإيمان نحن كلنا موجوعين لكن الموجوع ما بزيد الجرح جرح وربنا يحفظ السودان وأهله ويردنا اليه ردا جميلا. والله من وراء القصد.
*تخريمه١*
(رسالة لكل السودانيين في العالم).
*يا أهلنا* وين ما كنتو في أوروبا أمريكا الخليج أفريقيا نحن سودانيين أخلاقنا وكرامتنا معروفة لمن يقولوا سوداني الكلام انتهى لكن الليلة بنسمع أخبار توجع القلب سجون اتملت شبابنا في كل بلد بسبب اغتصاب تحرش سرقة مخدرات جرائم ما بتشبهنا وما بتشبه السودان ِالشباب الغلطوا ربنا يهديكم ويفك أسركم وترجعوا أهلكم والباقين انتبهوا ووعوا بعض.
القانون في أي بلد ما بلعب والكرامة ما بالغلط والعيب عيب في الغربة سمعتنا أمانة في رقبتنا كلنا خلونا يد واحدة نحافظ على اسم السودان في المساجد في الونسات في الشغل السوداني تاج فوق الراس ما نخلي زول يشوهو حفظ الله شبابنا وين ما كانو
وحفظ سمعة السودان في كل العالم.
*نقطة وسطر جديد*
(من الخيانة إلى النصر والبناء).
*لا شيء* أشد مرارة من الخيانة
ولا أقسى على النفوس من الغدر بالوطن في ساعة الشدة وفي الثالث والعشرين من أبريل عام ٢٠٢٣م حاولت مليشيا آل دقلو المتمردة أن تنال من وحدة السودان
فاصطدمت بإرادة شعب وقف صفاً واحداً خلف قواته المسلحة والأجهزة النظامية وبفضل الله ثم بتضحيات الأبطال تحطمت المؤامرة وسقطت أوهام المرتزقة ومعركة التحرير لا تكتمل إلا بمعركة البناء فكما لا مجاملة في الأمن والدفاع عن الأرض
كذلك لا مجاملة في النظافة وحفظ الصحة العامة وحماية مكتسبات الوطن.
*إلى كل ولاة الولايات* اهتموا بأمر معيشة المواطن فهو عمود استقرار الدولة
واجعلوا من صحة البيئة ونظافة الشوارع أولوية قصوى فالنفايات المتراكمة في مدننا وحوارينا صورة أخرى من صور التخريب يجب أن نهزمها كما هزمنا التمرد بالوحدة والانضباط وحاسبوا المقصرين من أصغر عامل إلى أكبر مدير وانزلوا من المكاتب المكيفة إلى الشارع لتستنشقوا مع المواطن همومه
*وإلى أئمة المساجد* وخطباء المنابر يوم الجمعة
أنتم صوت الوعي وحصن القيم وجهوا الناس إلى أهمية الوطن وعظموا حب الأرض والانتماء
ذكروهم بحماية المكتسبات وعلموهم كيف يكشفون من يتربص بأمن الوطن
فالوطن لا يحمى بالسلاح وحده بل يحمى بالوعي والمسؤولية المرحلة تحتاج والي يحاسب وينزل للشارع وإمام يوقظ الضمير ويبني الوجدان ومواطن يلتزم ويحافظ ويكون عيناً ساهرة مع أجهزته الأمنية
سيبقى السودان شامخاً بعزيمة أبنائه وحكمة قيادته ينهض من كل محنة أقوى وأوحد وأعز ليكتب فصلاً جديداً من البناء والنهضة والكرامة
حفظ الله السودان وأهله ونصر قواتنا المسلحة والأجهزة الأمنية ووفق ولاة أمرنا وأئمتنا لخدمة الوطن والمواطن
والله ولي التوفيق.
*تخريمه٣*
(إلى الدكتور جبريل إبراهيم وزير الماليه).
يا دكتور الجنيه وقع والمواطن اتسحق
الغلاء حرق الناس والمرتب ما بكفي
السوق الموازي حاك.. عملة مزيفة مدمرة تجار عملة بيبيعوا عيني عينك
دهب مهرب ٢٤ ساعة الكرسي أمانة والتاريخ بسجل
الاقتصاد أمن قومي زي البندقية.
*القرار المطلوبة الان*.. وحد سعر الصرف.. اضرب المضاربين.. صادر العملة المزيفة. وقف تجار العملة دهب البلد يدخل الخزنة..وقف الطباعة العشوائية..
ارجع للإنتاج والزراعة.بلغ السيل الزبى يا تنقذ الجنيه يا البلد تضيع.. الشعب منتظر الفعل ما الكلام.
*محمدطه محمد عبدالله*
