*للسيد القائد* العام للقوات المسلحة رئيس مجلس السيادة..
ومعاهو تحية خاصة لوزير الداخلية ومدير المخابرات العامة.
ما في دولة بتقوم ولا مواطن بنوم مرتاح ولا نصر بكمل لو خلينا الغلط ساي بدون حساب أو خلينا المتفلتين يلعبو بهيبة القانون ويشوهو صورة البلد والمؤسسات.الزول البمد يدو على المواطن أو بنهب أو شايل سلاح وبروع الناس ده ما بمثل إلا نفسو بس. ومفروض يتحاسب طوالي حساب نجيض وعادل لأنو السكوت عن الغلط ما رحمة ده ظلم عديل للمواطن وكلام شين في حق الشرفاء..تاني مافي دسديس الكلام لازم يكون واضح لا كبير على القانون لا مجرم عندو ضهر لا زول يعبث بأمن الناس وكرامتهم ويطلع سليم.
*والشغل هسي داير فعل ما كلام ساي* القضاء العسكري يشتغل فورا ويحاسب أي زول ثبت عليهو غلط أو جريمة بدون تأخير ولا استثناء زول.سيطرة صارمة وحسم أي تحركات أو مظاهر سلاح بره إطار الدولة والنظام..
التحقيقات تتقال بالواضح وقدام الناس وكل زول متورط في نهب أو اعتداء أو مخدرات يمشي العدالة طوالي.الشرطة والنيابات ترجع تشتغل في المناطق الاتحررت عشان المواطن يلقى باب القانون فاتح ما مقفول في وشو.ما في زول يشيل سلاح ولا يلبس كاكي ساي إلا ناس الدولة والقوات الشغالة تحت قيادتها بس.الدولة هيبة والقانون فوق راس الكل والبمد يدو على المواطن لازم يلاقي الحساب عشان الناس تنوم آمنة والسودان يرجع قوي وعزيز ومهيب زي ما بنريدو.الله أكبر والعزة للسودان
*محمدطه محمد عبدالله*
