*السودان* ما انكسر يوم المدفع ضرب ولا يوم السوق ولع ولا يوم المصارف قفلت أبوابها *السودان* انكسر يوم بقينا نشوف الظلم قدام عيونا ونغمض ويوم الأخ سرق حق أخوه وقال دي شطارة ويوم الأمانة بقت نكتة قديمة والكذب بقى مهارة *الوطن* ما هدتو الطلقة هدتو قلوب مات فيها خوف الله هدتو قطيعة خلت الأخ ما بسأل عن أخوه والجار ما بعرف جاره هدتو حسد بخلي نجاح غيرك يوجعك وهدو جشع بخليك تنجو براك حتى لو البلد كلها غرقت *كيف* نطلب بركة ونحن أرحامنا مقطوعة *كيف* نستنى فرج ونحن أمانتنا ضايعة *كيف* نفتش عدالة في الشارع ونحن ظالمين بعض في البيوت *خلونا نكون صريحين* مصيبتنا ما كلها كرسي وحكومة *جزء* كبير منها طالع مننا نحنا من بيوتنا من تربيتنا من سكوتنا على الغلط من مجاملتنا للحرامي طالما بدينا حاجة. *نحن بنبكي على السودان* كأنو وطن تاني وناسين إنو السودان نحنا ذاتنا بلحمنا ودمنا لو نحنا صلحنا السودان بتصلح.. ولو نحنا خربنا مافي زول بعمرو لينا.
*محمدطه محمد عبدالله*
