*من القلب إلى القلب* (رسالة إلى الشعب السوداني الوطن أمانة). *يا أهل السودان يا طيبين* (خدمة الوطن ما بتتقاس بالراتب)
*الراتب* آخر الشهر بينتهي ويتصرف لكن اسمك في تاريخ بلدك بفضل. الدكتور والبروفيسور والعامل والطالب والتاجر كلنا ركاب في سفينة واحدة اسمها السودان.لو غرقت السفينة ما حيسألوك كنت بتقبض كم *حيسألوك* جدفت ولا اتفرجت؟.
*حب الوطن من الإيمان*
النبي صل الله عليه وسلم قال *حب الأوطان من الإيمان*. يعني لما تشتغل بضمير لما تنظف شارعك لما تراقب الله في شغلك انت بتتعبد ربنا قبل ما تخدم وطنك.*شوفوا* الصين كيف عبرت ما كان عندهم لا بترول لا ذهب أول. كان عندهم شعب قرر بقولهم (نبني بلدنا بيدنا) الدكتور شال الطوب مع العامل المهندس بات في الموقع التاجر دفع ضرائب وهو راضي.ما كانوا بيسألوا *حاخد كم زيادة*؟ كانوا بيسألوا *بلدنا متين تقيف؟*
(وأما نحن) عندنا عقول ودهب ونيل وأرض ما شاء الله لكن عندنا *فلسفة عمياء* واحد يشتغل نص دوام وينتظر راتب كامل واحد يسرق المال العام ويقول *الحكومة حرامية* واحد يهاجر ويشتم البلد من برا والكل ينتظر *الحكومة* تصلح براها.*الخلاصة* اخواني سودانيين:
*١* قدم ما عليك اليوم حتى لو الراتب بسيط.اتقن شغلك كأنك تشتغل لنفسك.
*٢* انتمي حسيا وجعك من قطع الكهرباء؟ وجعك من الزبالة في الشارع؟ كويس. معناها لسه قلبك حي.
*٣* سيب الفلسفة واشتغل البلد ما بتنصلح بالبوستات بتنصلح بالعرق. *السودان* ما محتاج أبطال خارقين.محتاج ملايين سودانيين عاديين يشتغلوا بضمير.*إن الله لا يغير ما بقوم حتى يغيروا ما بأنفسهم* والله لو اتغيرنا سوا السودان يبقى من الدول البشار إليها بالبنان واولادنا وأحفادنا يدعوا لينا. *السودان* أولاً وحب الوطن من الإيمان.
*محمدطه محمد عبدالله*
